റിപ്പോര്‍ട്ടര്‍ ടിവി സംപ്രേഷണം അവസാനിപ്പിച്ചു
റിപ്പോര്‍ട്ടര്‍ ടിവി താത്കാലികമായി സംപ്രേഷണം അവസാനിപ്പിച്ചു. ചാനല്‍ നവീകരണത്തിന്റെ ഭാഗമായുള്ള ജോലികള്‍ പൂര്‍ത്തികരിക്കാനാണ് ചാനല്‍ താത്കാലികമായി പ്രവര്‍ത്തനം അവസാനിപ്പിച്ചത് എന്നാണ് ചാനൽ നൽകുന്ന വിശദീകരണം.ഇന്നലെ വൈകിട്ടാണ് ചാനല്‍ താത്കാലികമായി പ്രവര്‍ത്തനം നിര്‍ത്തുന്നുവെന്ന് അറിയിച്ചത്.
റിപ്പോര്‍ട്ടര്‍ ചാനലിന്റെ വെബ്‌സൈറ്റും പ്രവര്‍ത്തനം നിര്‍ത്തിയിട്ടുണ്ട്.
റിപ്പോര്‍ട്ടര്‍ ടിവി അടുത്തിടെ പ്രമുഖ വ്യവസായ ഗ്രൂപ്പായ മംഗോ ഗ്രൂപ്പ്‌ ഏറ്റെടുത്തിരുന്നു. ഇതിന്റെ ഭാഗമായി ചാനല്‍ തലപ്പത്ത് ചില മാറ്റങ്ങള്‍ വരുത്തിയിരുന്നു. മീഡിയ വണ്‍ ചാനലില്‍ പ്രവര്‍ത്തിച്ചിരുന്ന സ്മൃതി പരുത്തിക്കാടിനെ എക്‌സിക്യൂട്ടിവ് എഡിറ്ററായി നിയമിക്കുകയും 24 ന്യൂസിലെ എഡിറ്ററായിരുന്ന സുജയ പാര്‍വതിയെ ടിവി കോര്‍ഡിനേറ്റിങ്ങ് എഡിറ്ററായും നിയമിച്ചിരുന്നു.
പ്രമുഖ മാധ്യമപ്രവര്‍ത്തകന്‍ ഉണ്ണി ബാലകൃഷ്ണനെ റിപ്പോര്‍ട്ടര്‍ ടിവി ഡിജിറ്റല്‍ വിഭാഗം ഹെഡായി നിയമിച്ചു. ന്യൂഡല്‍ഹി കേന്ദ്രമായുള്ള വ്യവസായ ഗ്രൂപ്പാണ് മംഗോ.വിവാദമായ മുട്ടിൽ മരം മുറി കേസിലെ മുഖ്യ പ്രതികളാണ് മംഗോ ഗ്രൂപ്പ്‌ ഉടമകൾ . ചാനലില്‍ അടിമുടി മാറ്റങ്ങള്‍ വരുത്തുന്നതിന്റെ ആദ്യഭാഗമായാണ് പുതിയ നിമനങ്ങള്‍ എന്നാണ് സൂചന.
