ഹോളികയെ കത്തിക്കുന്ന കഥ
നന്മയുടെ വിജയം
അശ്വതി
ന്യൂഡൽഹി : ഹോളിയുടെ പിന്നിൽ ഒരു ശക്തമായ പുരാണകഥയുണ്ട് ദുഷ്ടതയെ തോൽപ്പിച്ച വിശ്വാസത്തിന്റെ കഥ…
ഒരിക്കൽ ഹിരണ്യകശിപു എന്ന അസുരരാജാവ് ഉണ്ടായിരുന്നു.
ഹിരണ്യകശിപു അതിയായ അഹങ്കാരിയും ക്രൂരനും ആയിരുന്നു. കഠിനമായ തപസ്സിലൂടെ അവൻ ദേവന്മാരിൽ നിന്ന് വലിയ വരങ്ങൾ നേടി. അതിനുശേഷം അവൻ തന്നെ ദൈവമാണെന്ന് പ്രഖ്യാപിച്ചു.
അവന്റെ മകൻ പ്രഹ്ലാദൻ മാത്രം അവനെ ദൈവമായി അംഗീകരിച്ചില്ല.
പ്രഹ്ലാദൻ ദൈവവിശ്വാസത്തിൽ ഉറച്ചവനായിരുന്നു. അവൻ ഭഗവാൻ വിഷ്ണുവിനെ മാത്രം ആരാധിച്ചു.
ഇത് ഹിരണ്യകശിപുവിനെ കോപിതനാക്കി.
അവൻ പലതവണ പ്രഹ്ലാദനെ കൊല്ലാൻ ശ്രമിച്ചു പാമ്പുകൾ, മലമുകളിൽ നിന്ന് തള്ളൽ, വിഷം… ഒന്നും ഫലിച്ചില്ല. പ്രഹ്ലാദന്റെ വിശ്വാസം അവനെ കാത്തു.
അവസാനം രാജാവ് തന്റെ സഹോദരിയായ ഹോളികയെ വിളിച്ചു.
ഹോളികക്ക് ഒരു പ്രത്യേക വരം ഉണ്ടായിരുന്നു തീയിൽ കത്തുകയില്ല എന്നത്.
പദ്ധതി ഇങ്ങനെയായിരുന്നു:
ഹോളിക പ്രഹ്ലാദനെ കയ്യിൽ ഇരുത്തി തീയിൽ ഇരിക്കണം. പ്രഹ്ലാദൻ കത്തിപ്പോകും, അവൾക്ക് ഒന്നും സംഭവിക്കില്ല.
അങ്ങനെ വലിയ ചിത തീർത്തു. ജനങ്ങൾ ഭയത്തോടെ നോക്കി.
ഹോളിക പ്രഹ്ലാദനെ മടിയിൽ ഇരുത്തി തീയിൽ കയറി.
പ്രഹ്ലാദൻ കണ്ണടച്ച് വിഷ്ണുവിനെ പ്രാർത്ഥിച്ചു.
പക്ഷേ ദൈവന്യായം വ്യത്യസ്തമായിരുന്നു.
ഹോളികയുടെ വരം ദുരുപയോഗം ചെയ്തതിനാൽ, അവളുടെ ശക്തി നഷ്ടപ്പെട്ടു. തീ അവളെ കത്തിച്ചു.
പ്രഹ്ലാദൻ മാത്രം അത്ഭുതകരമായി രക്ഷപ്പെട്ടു.
അത് ദുഷ്ടതയുടെ അഹങ്കാരം കത്തിച്ച ദിനമായിരുന്നു.
പിന്നീട് ഭഗവാൻ വിഷ്ണു നരസിംഹാവതാരമായി പ്രത്യക്ഷപ്പെട്ടു
നരസിംഹം ആയി ഹിരണ്യകശിപുവിനെ നശിപ്പിച്ചു.
അന്നുമുതൽ, ഹോളിക്ക് മുമ്പുള്ള രാത്രി “ഹോളിക ദഹൻ” ആയി ആഘോഷിക്കുന്നു.
ആ രാത്രി തീ കൊളുത്തുന്നത് ഒരു ആചാരമാത്രമല്ല. ..
അഹങ്കാരം, അസൂയ, ദ്വേഷം എന്നിവ കത്തിച്ചുകളയാനുള്ള പ്രതീകമാണ്.
ഹോളിക ദഹൻ നമ്മെ ഓർമ്മിപ്പിക്കുന്നത്:
നന്മയുള്ള വിശ്വാസം ഒരിക്കലും തോൽക്കില്ല.
അഹങ്കാരം എത്ര ശക്തമായാലും, സത്യത്തിന്റെ മുന്നിൽ കത്തിപ്പോകും.
