അമ്മയുടെ ശബ്ദം പോലെ നമ്മെ രൂപപ്പെടുത്തുന്ന ഭാഷ. …മലയാളം

ഇന്നു മാതൃഭാഷാദിനം



അശ്വതി

രാവിലെ ഒരു കുഞ്ഞ് “അമ്മ” എന്ന് വിളിക്കുന്ന ആദ്യ വാക്ക്…
വീട്ടിലെ മൂപ്പൻ പഴയ കഥകൾ പറയുന്ന ഭാഷ…
ഓർമ്മകളിലും കണ്ണീരിലും ചിരിയിലും നമ്മെ ചേർത്തുനിർത്തുന്ന ആ ശബ്ദം …
അതാണ് മാതൃഭാഷ.

ഫെബ്രുവരി 21 ലോകം “അന്താരാഷ്ട്ര മാതൃഭാഷാദിനം” ആയി ആചരിക്കുന്നത് വെറും ഔപചാരിക ദിനമല്ല. ഭാഷ മനുഷ്യന്റെ തിരിച്ചറിയലാണെന്ന് ഓർമ്മിപ്പിക്കുന്ന ദിനമാണ്. ഈ ദിനം ഔദ്യോഗികമായി പ്രഖ്യാപിച്ചത് UNESCO ആണ്.

ഒരു രക്തസാക്ഷികളുടെ ഓർമ്മ
1952-ൽ ഇന്നത്തെ Bangladesh രാജ്യത്തിലെ Dhaka നഗരത്തിൽ വിദ്യാർത്ഥികൾ അവരുടെ ഭാഷയ്ക്ക് അവകാശം ആവശ്യപ്പെട്ട് തെരുവിലിറങ്ങി. അവരുടെ ശബ്ദം അടിച്ചമർത്താൻ ശ്രമിച്ചപ്പോൾ, ചില ജീവൻ നഷ്ടപ്പെട്ടു.
ആ രക്തസാക്ഷികളുടെ സ്വപ്നം ഇന്നൊരു ലോകദിനമായി മാറി .ഭാഷയെ സ്നേഹിക്കാൻ ലോകത്തെ പഠിപ്പിച്ച ഒരു ചരിത്രം.

ഭാഷ  വീട്ടിലെ സ്നേഹത്തിന്റെ ആദ്യ പാഠം.
ഒരു അമ്മ കുട്ടിക്ക് പാട്ടുപാടുന്നത് ഇംഗ്ലീഷിലല്ല അവളുടെ സ്വന്തം ഭാഷയിലാണ്.
ഒരു അച്ഛൻ ഉപദേശം നൽകുന്നത് പുസ്തകഭാഷയിൽ അല്ല, സന്ധ്യാ നാമങ്ങൾ പ്രാർത്ഥനകൾ വീട്ടിൽ സംസാരിക്കുന്ന ഭാഷയിലാണ്.
അതിനാൽ മാതൃഭാഷ പഠിക്കുന്നത് പഠനത്തിന്റെ തുടക്കം മാത്രമല്ല  അത് ബന്ധങ്ങളുടെ അടിത്തറയാണ്.

പഠനവിദഗ്ധർ പറയുന്നു  കുട്ടി മാതൃഭാഷയിൽ പഠിച്ചാൽ ചിന്താശേഷിയും ആത്മവിശ്വാസവും ഇരട്ടിയാകും. സ്വന്തം ഭാഷയിൽ സ്വപ്നം കാണുന്ന കുട്ടി ലോകഭാഷകളും എളുപ്പം പഠിക്കും.

ഇന്നത്തെ നിശബ്ദ ഭീഷണി
ഇന്ന് നഗരങ്ങളിലെ പല വീടുകളിലും ഒരു പുതിയ നിയമം:
“കുട്ടിയോട് മലയാളം അല്ലെങ്കിൽ മാതൃഭാഷ സംസാരിക്കരുത്… ഇംഗ്ലീഷ് മാത്രം.”

ഇത് വിദ്യാഭ്യാസത്തിനായി നല്ലതാണെന്ന് പലരും കരുതുന്നു. പക്ഷേ  പതുക്കെ പതുക്കെ കുട്ടിക്ക് സ്വന്തം ഭാഷയിൽ ഒരു മുഴുവൻ വാചകം പോലും പറയാൻ കഴിയാത്ത അവസ്ഥ വരുന്നു.
ഭാഷ മറക്കുമ്പോൾ, കഥകളും പഴമൊഴികളും നാട്ടിന്റെ ഓർമ്മകളും എന്തിന് ബന്ധങ്ങൾ പോലും ഒപ്പം മറയുന്നു.

ഭാഷ സംരക്ഷിക്കൽ വലിയ പ്രോഗ്രാം വേണ്ട,
ഭാഷയെ രക്ഷിക്കാൻ വലിയ പ്രസ്ഥാനങ്ങൾ ആവശ്യമില്ല.
ചെറിയ കാര്യങ്ങൾ മതി…
വീട്ടിൽ കുട്ടിയോട് മാതൃഭാഷയിൽ സംസാരിക്കുക ,നാട്ടിൻറെ കഥകൾ പറയുക,
പുസ്തകങ്ങൾ വാങ്ങി വായിക്കാൻ കൊടുക്കുക ,സോഷ്യൽ മീഡിയയിൽ സ്വന്തം ഭാഷയിൽ എഴുതുക

ഫെബ്രുവരി 21 നമ്മോട് ചോദിക്കുന്നത് ഒരു ചോദ്യം മാത്രം:
“നമ്മുടെ കുട്ടികൾക്ക് നാം ഭാഷ പകർന്നു കൊടുക്കുന്നുണ്ടോ… ഇല്ലെങ്കിൽ വെറും future മാത്രം?”

മലയാളം വെറും വാക്കുകളല്ല
അത് ഹൃദയത്തിന്റെ താളമാണ്
ഓർമ്മകളുടെ സംഗീതമാണ്
തലമുറകളിലൂടെ ഒഴുകുന്ന ഒരു നദിയാണ്…