തീവ്രവാദത്തിനെതിരായ ഇന്ത്യയുടെ പോരാട്ടത്തിന് റഷ്യയുടെ പിന്തുണ
ന്യൂഡൽഹി : തീവ്രവാദത്തിനെതിരായ ഇന്ത്യയുടെ പോരാട്ടത്തിന് മോസ്കോ പൂർണ്ണമായി പിന്തുണ നൽകുമെന്ന് റഷ്യൻ പ്രസിഡൻ്റ് വ്ളാഡിമിർ പുടിൻ വ്യക്തമാക്കി. അക്രമപരമായ തീവ്രവാദത്തെ നേരിടുന്നതിൽ ഇന്ത്യ തങ്ങളുടെ ഒരു പൂർണ്ണ സഖ്യകക്ഷിയാണെന്നും അദ്ദേഹം വിശേഷിപ്പിച്ചു. പഹൽഗാമിലെയും ഡൽഹിയിലെയും ഭീകരാക്രമണങ്ങളെക്കുറിച്ചും, ഒരേ ഗ്രൂപ്പിനെ ഒരു രാജ്യത്ത് ഭീകരരായും മറ്റൊരു രാജ്യത്ത് സ്വാതന്ത്ര്യ പോരാളികളായും ലേബൽ ചെയ്യുന്ന ആഗോള പ്രവണതയെക്കുറിച്ചുമുള്ള ചോദ്യത്തിന് മറുപടി പറയവെയാണ് പുടിൻ ഈ അഭിപ്രായങ്ങൾ പ്രകടിപ്പിച്ചത്.
ഭീകരതയോടുള്ള ഈ ഇരട്ട സമീപനത്തെ രാജ്യങ്ങൾ എങ്ങനെ നേരിടണം എന്ന ചോദ്യത്തിന് പുടിൻ വ്യക്തമായ മറുപടി നൽകി. “അത് വളരെ ലളിതമാണ്. സ്വാതന്ത്ര്യം നേടുന്നതിന് നമ്മൾ നിയമപരമായ മാർഗ്ഗങ്ങൾ മാത്രമേ ഉപയോഗിക്കാവൂ. ക്രിമിനൽ രീതികളോ ആളുകൾക്ക് ദോഷം വരുത്തുന്നതോ ആയ ഒരു നടപടിയെയും പിന്തുണയ്ക്കാൻ കഴിയില്ല,” അദ്ദേഹം പറഞ്ഞു.
