മോഷണശ്രമം.എക്സോസ്റ്റ് ഫാനിൽ കുടുങ്ങി മോഷ്ടാവ്
രാജസ്ഥാനിലെ കോട്ടയിൽ സിനിമകളെ വെല്ലുന്ന രീതിയിലുള്ള ഒരു മോഷണശ്രമമാണ് അരങ്ങേറിയത്. ഒരു വീട്ടിൽ മോഷണത്തിനായി അതിക്രമിച്ചു കയറിയ യുവാവ് അടുക്കളയിലെ എക്സോസ്റ്റ് ഫാൻ വെക്കുന്ന തുളയിൽ (Shaft) കുടുങ്ങിപ്പോകുകയായിരുന്നു. പുറത്തിറങ്ങാനാകാതെ ഏകദേശം ഒരു മണിക്കൂറോളം ഇയാൾ അവിടെ തൂങ്ങിക്കിടന്നു.
ജനുവരി 3-ന് സുഭാഷ് കുമാർ റാവത്തിന്റെ വീട്ടിലായിരുന്നു സംഭവം. സുഭാഷും കുടുംബവും ഖാട്ടുശ്യാംജിയിലേക്ക് യാത്ര പോയ സമയത്തായിരുന്നു മോഷണശ്രമം നടന്നത്. അടുത്ത ദിവസം പുലർച്ചെ ഒരു മണിയോടെ ഇവർ മടങ്ങിയെത്തി വീടിന്റെ പ്രധാന കവാടം തുറന്നപ്പോഴാണ് മോഷണശ്രമം ശ്രദ്ധയിൽപ്പെട്ടത്. പുറത്ത് പാർക്ക് ചെയ്തിരുന്ന സ്കൂട്ടറിന്റെ ഹെഡ്ലൈറ്റ് അടുക്കളയിലേക്ക് പതിച്ചപ്പോൾ അവിടെ ഒരാൾ തൂങ്ങിക്കിടക്കുന്നത് വീട്ടുകാർ കണ്ടു.
രണ്ട് ദിവസങ്ങളിൽ വീട്ടിനകത്ത് കയറി മോഷണം നടത്തിയത് ഒരാൾ ആണെങ്കിലും ഇയാൾക്ക് പുറമെ നിന്നും സഹായം ലഭിച്ചിട്ടുണ്ടെന്നാണ് പൊലീസ് കരുതുന്നത്.
എക്സോസ്റ്റ് ഫാൻ ഇരിക്കുന്ന ദ്വാരത്തിലൂടെ അകത്തേക്ക് കടക്കാൻ ശ്രമിച്ച മോഷ്ടാവ് പകുതി ശരീരം അകത്തും പകുതി പുറത്തുമായി കുടുങ്ങിക്കിടക്കുകയായിരുന്നു.
മോഷണ ലക്ഷ്യത്തോടെയാണ് പ്രതി വീടിനുള്ളിൽ കടക്കാൻ ശ്രമിച്ചതെന്ന് പോലീസ് പറഞ്ഞു. എക്സോസ്റ്റ് ഫാനിന്റെ ഇടുങ്ങിയ ദ്വാരത്തിലൂടെ നുഴഞ്ഞുകയറാൻ ശ്രമിക്കുന്നതിനിടെ ഇയാൾ അവിടെ കുടുങ്ങിപ്പോകുകയായിരുന്നു. സ്വന്തമായി മോചിതനാകാൻ ഇയാൾക്ക് സാധിച്ചില്ല. ഈ സമയം ബഹളം കേട്ടതോടെ പുറത്ത് കാവൽ നിന്ന സഹായി ഇയാളെ ഉപേക്ഷിച്ച് സ്ഥലത്തുനിന്ന് ഓടി രക്ഷപ്പെട്ടു.
നാട്ടുകാർ വിവരമറിഞ്ഞതോടെ സ്ഥലത്ത് വലിയ തിരക്കാണ് അനുഭവപ്പെട്ടത്. ഏകദേശം ഒരു മണിക്കൂറോളം നീണ്ടുനിന്ന നാടകീയമായ രംഗങ്ങൾക്കൊടുവിലാണ് പോലീസെത്തി ഇയാളെ പുറത്തെടുത്തത്.
