പൃഥ്വിരാജിന്റെയും ദുൽഖർ സൽമാന്റെയും വീടുകളിൽ  റെയ്ഡ്.

എറണാകുളം : പൃഥ്വിരാജിന്റെയും ദുൽഖർ സൽമാന്റെയും വീടുകളിൽ കസ്റ്റംസ് റെയ്ഡ്. ദുൽഖറിന്റെ പനമ്പിള്ളി നഗറിലുള്ള വീട്, പൃഥ്വിരാജിന്റെ തേവരയിലുള്ള വീട് എന്നിവിടങ്ങളിലാണ് കസ്റ്റംസിന്റെ നേതൃത്വത്തിൽ പരിശോധന നടക്കുന്നത്. കസ്റ്റംസിന്റെ നേതൃത്വത്തിൽ രാജ്യവ്യാപകമായി നടത്തുന്ന ഓപ്പറേഷൻ നുംകൂറിന്റെ ഭാഗമായാണിത്.

പൃഥ്വിരാജിന്റെ തിരുവനന്തപുരത്തെ വീട്ടിൽ സംഘം എത്തിയെങ്കിലും അവിടെ വാഹനങ്ങൾ ഇല്ലാത്തതിനാൽ പരിശോധന നടത്താതെ മടങ്ങിപ്പോയി. ഭൂട്ടാൻ വഴി ആഡംബര കാറുകൾ നികുതിവെട്ടിച്ച് ഇന്ത്യയിൽ എത്തിക്കുന്നെന്ന കണ്ടെത്തലിനെ തുടർന്നാണ് രാജ്യവ്യാപകമായി കസ്റ്റംസ് റെയ്ഡ് നടത്തുന്നത്. നടന്മാരുടെ വീടുകളിലടക്കം കേരളത്തിൽ മുപ്പതിടങ്ങളിലാണ് കസ്റ്റംസ് ഇന്ന് പരിശോധന നടത്തുന്നത്.
മോട്ടോർ വാഹന വകുപ്പുമായി ചേർന്നാണ് പരിശോധന നടത്തുന്നത്. എട്ട് മോഡൽ കാറുകൾ നികുതി വെട്ടിച്ച് ഇന്ത്യയിലെത്തിച്ചതായി കസ്റ്റംസ് കണ്ടെത്തി. തിരുവനന്തപുരം, എറണാകുളം, കോട്ടയം, കോഴിക്കോട്, മലപ്പുറം ജില്ലകളിലെ 30 കേന്ദ്രങ്ങളിലായി പരിശോധന പുരോഗമിക്കുകയാണ്. ഇതിന് പുറമെ സംസ്ഥാനത്തെ വിവിധ കാർ ഷോറൂമുകളിലും വ്യവസായികളുടെ വീടുകളിലും പരിശോധന നടക്കുന്നുണ്ടെന്നാണ് റിപ്പോർട്ടുകൾ.