നഷ്ടങ്ങൾ തുടർക്കഥയാകുന്ന മലയാള സിനിമ
എറണാകുളം :നിലവാരമുള്ള ചിരി മലയാളത്തിനു സമ്മാനിച്ച, 3 പതിറ്റാണ്ടോളം മലയാളിയെ ചിരിപ്പിച്ച പ്രശസ്ത സംവിധായകന് സിദ്ദീഖ് (67) വിട വാങ്ങുമ്പോൾ മലയാളക്കര മാത്രമല്ല അദ്ദേഹത്തിന്റെ സിനിമകൾ ആസ്വദിച്ച സിനിമ പ്രേക്ഷകർ സങ്കടത്തിലാണ്. മലയാള സിനിമയുടെ ഗതിയെ മാറ്റിയ ചിരിച്ചത്രങ്ങൾ വിജയകരമാക്കാമെന്ന് തെളിയിച്ച സംവിധായകനായിരുന്നു സിദ്ദീഖ്. എറണാകുളത്തെ സ്വകാര്യ ആശുപത്രിയില് ചികിത്സയില് കഴിയുന്നതിനിടെയായിരുന്നു അന്ത്യം. കരൾ രോഗബാധയെ തുടർന്ന് ഒരു മാസമായി എറണാകുളം അമൃത ആശുപത്രിയിൽ ചികിത്സയിലായിരുന്ന സിദ്ദീഖ് പെട്ടെന്നുണ്ടായ ഹൃദയാഘാതത്തെ തുടർന്ന് ഗുരുതരാവസ്ഥയിലാവുകയും ചൊവ്വാഴ്ച രാത്രി ഒൻപതോടെ മരണം സ്ഥിരീകരിക്കുകയുമായിരുന്നു. ബുധനാഴ്ച രാവിലെ 9 മുതൽ 11.30 വരെ കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിലും തുടർന്ന് കാക്കനാട് പള്ളിക്കരയിലുള്ള സ്വവസതിയിലും പൊതുദർശനം. വൈകിട്ട് ആറിന് എറണാകുളം സെൻട്രൽ ജുമാ മസ്ജിദിൽ ഔദ്യോഗിക ബഹുമതികളോടെ കബറടക്കം.
1989ല് റാംജി റാവു സ്പീക്കിങ് എന്ന ചിത്രത്തിലൂടെ സംവിധാന രംഗത്തേക്ക് എത്തിയ സിദ്ദീഖ്്, തിരക്കഥാകൃത്ത്, നടന്, നിര്മാതാവ് എന്നീ നിലകളിലും സജീവമായിരുന്നു. 1956ല് എറണാകുളം കലൂര് ചര്ച്ച് റോഡില് സൈനബാസില് ഇസ്മയില് റാവുത്തരുടെയും സൈനബയുടെയും മകനായാണ് സിദ്ദീഖിന്റെ ജനനം. കലൂര് ഗവ. ഹൈസ്കൂള്, കളമശേരി സെന്റ് പോള്സ് കോളജ്, മഹാരാജാസ് കോളജ് എന്നിവിടങ്ങളില് വിദ്യാഭ്യാസം. ഭാര്യ: സജിത. മക്കള്: സൗമ്യ, സാറ, സുകൂണ്.
